Tərlan Əbilovdan haykular

 

İpdəki köynək

Əl-qolunu tərpədir,

Küləyin hirslə...

***

Dimdiyində çöp

Uçur harasa bir quş,

Cücərir yuva...

***

Milçək deyinir-

Qənd qabının ağzı

Bağlıdır deyə...

***

Pəncərələrin

Pərdəsini çəkirsən,

Gün doğur şəhrə.

***

Su verdim, içdi,

Yanğısı yatdı gülün,

Toxtadı dibçək...

***

Göyə baxıram,

Hara aparmır məni

Bu durduğum yer...

***

Varağın əsli

Gedib ağaca çıxır-

Bir tumurcuqtək...

***

Köhnə divara

Bir ürək şəkli çəkdim,

Çırpındı daşlar.

***

Kim bilir, bəlkə

Şeirdən bir misradır

Düşən qaranlıq...

***

Atlar kişnəyir,

Əlində qılınc ölür

Sonuncu ümid...