"Heç olmasa bir dəfə" - Raqif Raufoğlu

 

Hamının heç olmazsa bir dəfə

gözlədiyi bir adam olur

Lazım olmayan zamanda gələn

Hamı heç olmazsa bir dəfə

suallarına cavab axtarır

Tanımadığı adamın gözlərində

Hamının heç olmazsa bir dəfə

Tanımadığı adama işi düşür

Tanıdığı adamlardan danışmağa

Hamı hec olmazsa bir dəfə

görüşə çağırır kimisə

görüm gələcəkmi deyə

Hamının heç olmazsa bir dəfə

balaca bir gündəliyi olur

Unutmağa saxladığı

Hamı heç olmazsa bir dəfə

Tavana ağcaqanad izi qoyur

Maraqsız gecələrdə baxmağa

Hamının heç olmazsa bir dəfə

yaşamaq şansı olur.

arzulamadığı həyatını yaşamaq

Hamı heç olmazsa bir dəfə

doğulur ki, tək qalmasın

Ömründə bir dəfə doğulanlar

Hamının heç olmazsa bir dəfə

İtirdiyi bir gənclik olur

"İnşallah"la itirdiyi

Hamının heç olmazsa bir dəfə

gözlərini yumub dediyi bir söz olur:

"Heç olmazsa bir dəfə!"